MCCOY, MATAGAL NANG GUSTONG ITAKAS SI ELISSE PAALIS NG 'PINAS

ni Ador V. Saluta - @Adore Me! | May 18, 2022

Isa umano sa mga plano ni McCoy de Leon noong bago pa ang pandemya ay layasan ang Pilipinas at sa ibang bansa na lang manirahan kasama ang kinakasamang si Elisse Joson at ang kanilang baby na si Felise.

Sa dami raw ng kanilang trabaho ni Elisse, naging hadlang ito para sa kanilang dalawa. Kulang daw ang kanilang oras dahil sa paghihigpit sa trabaho, gaya ng programang It's Showtime, kung saan sila nagkakilala.

Sa nasabing show, halos araw-araw silang nakatali sa kanilang trabaho at konti na lang ang nakatuon sa kanilang pribadong buhay.

Pagtatapat ni McCoy sa isang panayam, "Lagi ko siyang gustong itakas sa ibang bansa," natatawa niyang bungad.

"Pero siyempre, batambata pa ako nu'n, hindi pa ako nakaipon. ('Yung) Dating love team namin, sobrang araw-araw 'yung trabaho namin kaya siguro 'yung time na 'yun, 'yun din ang nakakahadlang. Kumbaga, konti lang talaga 'yung free time namin. Kahit (makapunta) sa ibang lugar, mahirap, kasi 'yung oras talaga (sagabal)," katwiran ng actor.

Kaya naman sinasamantala nila ng asawa at anak na magtodo-bonding. Kagagaling lang nila sa Panglao, Bohol kung saan nila isinelebreyt ang first birthday ng kanilang anak at kamakailan lang ay nasa Boracay sila kasama ang ilang kaibigan at miyembro ng kanilang pamilya.

Manok na si Leni, olats… POKWANG, SININGIL ANG MGA MAKA-BBM NA MAY UTANG SA KANYA

ni Ador V. Saluta - @Adore Me! | May 16, 2022

Moving on na si Pokwang pagkatapos tanggapin ang resulta ng nakaraang halalan kung saa'y hindi nagtagumpay ang sinuportahan niya sa pagka-pangulo na si VP Leni Robredo.

Ang nakakatuwa kay Pokwang, part ng moving on niya ay ang hiling na sana'y magbayad na ng kanilang utang ang mga kalabang BBM o mga tagasuporta ng nanalong pangulo na si Bongbong Marcos.

Bago pa ang paniningil, sinabi ng comedienne na tigilan na ang pamba-bash sa isa't isa dahil pare-pareho naman daw nagsalita ng hindi magaganda ang mga ito sa kani-kanyang kandidatong tumatakbo.

Mensahe ni Pokwang, "Ok, tapos na eleksiyon, tanggap na rin (namin), ganu'n talaga... Pero sana, 'yung mga BBM na kamag-anak at friends (ko), na nangutang sa akin, bayad-bayad na rin, ha? Okay?

“Tapos na ang ating ipinaglalaban, kaya't huwag nang magmalinis ang tagasuporta ng ating ipinagmamalaking kandidato, dahil kani-kanya tayong nagsalita ng hindi maganda sa kabilang kampo," himutok ni Pokwang na idinaan sa kanyang Twitter account.

ALYSSA, MAS PINILI ANG SERYE NG KATHNIEL KESA MAG-JOIN SA BEAUTY CONTEST

ni Ador V. Saluta - @Adore Me! | May 14, 2022

Mas pinili ni Alyssa Muhlach na tanggapin ang offer para makasama sa TV series na 2 Good 2 Be True kaysa ang nauna nitong planong pagsali sana sa beauty pageant ngayong taon.

Hindi naman isinasantabi ng baguhang star ang beauty pageants journey nito dahil makakapaghintay daw ang pagkakataong gaya nito kesa sa inaabangang teleserye ng bayan na mapapanood na starting May 16.

Sa isang panayam kay Alyssa, aniya, "I was actually thinking of joining another pageant this year, pero sabi ko, next time na ang korona."

Naging title holder na rin si Ayssa dahil siya ang nanalong Ms. Hispano-America Philippines sa isinagawang beauty contest sa Miss World Philippines 2018. Kaya naman desidido sana siyang ipagpatuloy ang pagiging beauty queen this year if not for 2 Good 2 Be True offer.

Aniya, hindi naman niya pinagsisisihan ang pagkakasama sa series over her pageant dreams dahil masayang-masaya siya na natupad din ang pinangarap niyang makasama sa isang project ang hinahangaang tambalang KathNiel.

"Lahat kami, we can say that we are so honored to work with KathNiel, kasi magkaka-age kami, kaya literal na when I come home from the school, sila talaga 'yung pinapanood namin sa TV, sa serye," kuwento pa ni Alyssa.

Aniya pa, "Naalala ko, ikinuwento ko kay Kath, I was actually thinking of joining another pageant this year (2022), pero sabi ko, next time na lang, KathNiel muna," masaya nitong pahayag.

Kahit kontrabida ang kanyang role sa 2G2BT, nasabi niyang hindi ganu'n kabagsik ang kanyang pagiging kontra sa tambalang KathNiel sa serye.

Paliwanag niya, "Hindi naman malala 'yung pagiging kontrabida. Malalaman na lang nila sa story kung saan nanggagaling ang karakter ko," sey pa niya.