Jason, updated daw lagi sa mga posts ng aktres… MELAI, UMAMING TODO-SELOS KAY IVANA

ni Ador V. Saluta @Adore Me! | November 17, 2023

Prangkang inamin ng komedyana at bida ng Ma'am Chief na si Melai Cantiveros na umano'y pinagseselosan niya ang FPJ's Batang Quiapo star na si Ivana Alawi.

Ini-reveal ito ni Melai nang mag-guest ang kanyang asawang si Jason Francisco sa morning talk show ng Kapamilya Network na Magandang Buhay nito lamang November 15.

"Masaya ako 'pag si Mamshie Reg (Regine Velasquez) pero 'pag ibang babae, si Ivana kasi...

Mamshie Reg, updated kasi sa bagong post ni Ivana," kuwento ni Melai sa naturang episode.

"Tingnan mo 'yung bagong post ni Ivana, alam mo ang sabi niya (Jason), 'Nakita ko na 'yan.' Huh?" hirit pa ni Melai.

Nagpaliwanag naman si Jason at aniya, lagi raw trending ang mga posts ni Ivana kaya lagi niya itong nakikita.

ERIC, UMAMING 3 YRS. NAGING SILA NI TONI

ni Ador V. Saluta @Adore Me! | November 16, 2023

Marami ang nagulat sa pambihirang rebelasyon ng isa sa mga dating miyembro ng grupong Gwapings na si Eric Fructuoso tungkol sa kanyang nakaraang relasyon.

Sa guesting ni Eric sa programang Sarap Diva ni Carmina Villarroel, tinanong ng host kung naging karelasyon ba nito si Toni Gonzaga noong panahong single pa ang actor.

Inamin ni Eric na naging girlfriend niya si Toni noon at inabot nang tatlong taon ang kanilang naging relasyon. Pero hindi na idinetalye ni Eric ang rason ng kanilang paghihiwalay.

Kahit si Carmina ay 'di makapaniwalang nagkaroon ng relasyon sina Eric at Toni dati.

Naging asawa ni Toni si Direk Paul Soriano at mayroon silang dalawang anak. Habang si Eric nama'y may kinakasamang non-showbiz girl at meron din silang anak.

Sa issue ng ghost employees… "HINDI PO AKO NAKULONG" — RODERICK

ni Ador V. Saluta @Adore Me! | November 9, 2023

Sa YouTube vlog ni Ogie Diaz, nakapanayam nito ang dating komedyante na naging konsehal sa District 2 ng Quezon City, si Roderick Paulate.

Sa umpisa ng panayam, iginiit ni Dick na wala sa kanyang pangarap na maging public servant.

Bata pa lamang daw siya'y pangarap na nitong umarte. Hanggang sa naging child actor si Roderick at pinasok na nga rin ang hostings at nagkaroon ng sariling show, ang Dick and Carmi.

Nagpatuloy ang kanyang kasikatan hanggang sa makilala siya bilang magaling na aktor. Nakasama niya sa mga pelikula si Maricel Soriano, ang kanyang itinuturing na "inay" at best friend.

Sa rurok ng kanyang kasikatan, may ilang kaibigan na inalok siyang maging public servant. Kasi raw, iba ang tawag ng pagtulong sa kapwa, kaya't naengganyo siyang subukan ito.

Hanggang sa nahalal siyang konsehal ng Quezon City for three terms at dito na siya nagpaka-busy.

Pansamantala niyang tinalikuran ang showbiz.

Lingid sa kanyang kaalaman, ang pagpasok niya sa serbisyo publiko ang magiging daan para madungisan ang kanyang pangalan nang isangkot siya sa kaso ng pagpapasuweldo sa mga ghost employees.

Sabi ni Roderick, wala pang pinal na desisyon dahil nakaapela pa sila sa Court of Appeals.

Sa panayam ni Ogie, sabi ni Dick, "Hindi ko puwedeng dungisan ang pangalan ko. Alam ng Diyos 'yan," makahulugan nitong sabi.

Kinuha na rin nito ang pagkakataon para magpaliwanag sa isyu na diumano'y nakulong siya.

"Nagko-comment 'yung mga tao, 'Akala ko, nakakulong 'yan?'" tanong ni Ogie kay Dick.

Pinabulaanan ng komedyante na siya'y nakakulong.

"Once and for all, hindi po ako nakulong. Minsan, lagyan ko na lang kunyari 'yung, 'Di ba, nakakulong siya?' lagyan ko na lang ng naka-ganu'n [demonstrates mouth-open emoji], kasi kung sasagot pa ako, baka humaba," paliwanag niya.

"'Yung iba naman, nilalagyan ko na lang ng heart... parang ganu'n na lang. Wala na tayong magagawa, eh, hindi naman lahat nakakaintindi," dagdag pa niya.

Hindi raw niya magagawa ang pelikula nila ni Maricel, ang In His Mother's Eyes kung siya'y nakakulong.

Hindi man pinalad na makasama ang In His Mother's Eyes sa mga entries sa darating na MMFF 2023 sa December 25, mas maaga namang ipapalabas sa mga sinehan ang pelikula at 'di ito dapat palagpasin.