Bawal na ring bumiyahe at magtrabaho… AI AI, BINAWI ANG PETISYON NA MAGING US CITIZEN ANG EX-MISTER

ni Ador V. Saluta @Adore Me! | Mar. 30, 2025

Ai Ai Delas Alas at Gerald - Instagram.jpg

Bawing-bawi na ngayon ang Comedy Queen na si Ai Ai delas Alas sa kanyang ex-husband na si Gerald Sibayan sa ginawa nitong panloloko sa kanya habang sila ay nasa USA.

Balita kasing pinaboran ng US Citizenship and Immigration Services (USCIS) ang apela ni Ai Ai noong Enero 8, 2025 na bawiin ang kanyang Petition for Alien Relative para kay Gerald.  

Unang nag-file ang Kapuso comedienne ng Petition for Alien Relative para kay Gerald noong Hulyo 15, 2021.  

Pero ang latest chika nga ni Ai Ai, “Automatically revoked,” na ang tinutukoy na petisyon ng aktres ay maging permanent resident ng Amerika o US green card holder ang kanyang estranged husband na si Gerald.  

Nakasaad daw sa desisyon ng USCIS na may petsang Marso 17, 2025, “After a thorough review of your petition and the record of evidence, we must inform you that the approval of your petition has been automatically revoked.”  

Ang pagkakaroon umano ng ibang babae ni Gerald ang isa sa mga inilahad na dahilan ni Ai Ai kaya binawi niya ang petisyong maging permanenteng residente ng Amerika ang dating asawa. 

Bukod dito, may plano rin daw si Ai Ai na i-divorce si Gerald at hindi na rin puwedeng umapela pa ang dating asawa sa naging desisyon ng USCIS. 

Nakasaad sa pasya ng USCIS na, “There is no appeal to this decision.”  

Maliban na lang kung maghain si Ai Ai ng motion to reopen or reconsider, na imposibleng mangyari sa ngayon dahil nasaktan siya nang husto sa ginawa sa kanya ng asawa.  

Ang malala pa rito, kasama rin sa mga hiningi ni Ai Ai ang pagbawi sa travel at work permit ni Gerald sa Amerika kaya paano pa ito mamumuhay nang normal doon?

---

Aktor, bayad… MARK, BINIGYAN NG FLOWERS SI JOJO, GIMIK LANG DAW

PARA sa “Revival King” na si Jojo Mendrez, tapos na ang ‘collaboration’ nila ng singer at aktor na si Mark Herras.  

Noong Martes, Marso 25, 2025, nagpatawag ng media conference si Jojo na ginanap sa Shutter Chinois Deli and Café sa Quezon City.  

Kasama ni Jojo na humarap sa entertainment media ang managers niyang sina David Cabawatan (David Bhowie) at Vince Apostol ng Aqueous Entertainment.  

Ayon kay David, “MarJo or Mark and Jojo is already a closed chapter.” 

MarJo ang tawag sa tandem nina Mark at Jojo kasabay ng promo ng revival song ng singer na Somewhere In My Past ng yumaong si Julie Vega.  

Nagsimula ang pag-uugnay sa dalawa nang maispatang magkasama sina Mark at Jojo sa isang hotel-casino noong Pebrero 5 bago pa ang balitang nag-guest sa isang gay bar si Mark sa may Pasay.  

Nasundan ito ng pagsipot ng aktor sa contract signing ng singer sa Star Music noong Pebrero 18.  

Sinorpresa ni Mark si Jojo sa pamamagitan ng pagbibigay ng bouquet of flowers dito.

Bagama’t may hinala ang ilang miyembro ng press na “gimik” lamang ang pagkikita nina Mark at Jojo, sinakyan pa rin ito ng ilan at ginawan ng anggulo na tila may namamagitan sa kanila.  

Pero ngayon ay nakumpirmang bahagi lamang ito ng promo para sa revival song ni Jojo.  

At may “honorarium” na natatanggap si Mark Herras kapag sinasamahan nito si Jojo Mendrez. 

Sa teaser ng movie, Pepsi, ni-rape raw ni Bossing… CYBERLIBEL CASE NI VIC VS. DIREK DARRYL, SUMAMPA NA SA KORTE

ni Ador V. Saluta @Adore Me! | Mar. 19, 2025

Vic Sotto at Darryl Yap - IG

Akala ng marami, nananahimik na ang kasong isinampa ni Vic Sotto against Darryl Yap, ang direktor ng pelikulang The Rapists of Pepsi Paloma (TROPP).

Pero umakyat na pala sa husgado ang reklamong cybelibel na inihain ni Vic laban sa direktor kaugnay ng controversial trailer ng pelikulang TROPP.

Sa inilabas na resolusyon ng Muntinlupa Regional Trial Court (RTC), nakitaan ng prosecutors ng sapat na basehan ang reklamo ni Vic kaya umakyat na ito sa husgado mula sa fiscal’s office.

Gayunman, ayon sa dokumento na may petsang March 17, 2025, 1 count lamang ng cyberlibel ang naaprubahan ng korte mula sa 19 counts na inihain ni Vic.

Bahagi ng nakasaad sa lumabas sa resolusyon, “The undersigned Assistant City Prosecutor accuses DARRYL RAY SPYKE YAP Y BALINGIT of the crime of Libel under Arts. 353 and 355 of the Revised Penal Code, as amended, in relation to violation of Sec.4(c)(4) of R.A. 10175, otherwise known as the Cybercrime Prevention Act of 2012.”

Isang mabigat na probable cause ng kaso ay ang pagbanggit sa pangalan ni Vic sa teaser ng hindi pa rin naipapalabas na pelikula ni Darryl tungkol sa buhay ng dating sexy star na si Pepsi Paloma.

Matatandaang noong January 9, 2025, nagsampa si Vic ng 19 counts of cyberlibel laban kay Darryl. Ito ay kaugnay ng kontrobersiyal na teaser ng pelikula ni Yap na TROPP, kung saan direktang binanggit ang pangalan ni Vic Sotto na diumano’y nang-rape kay Pepsi.

Sa teaser ng pelikula kung saan tampok sa eksena ang mga artistang sina Gina Alajar at Rhed Bustamante, tinanong ni Charito Solis (Gina) si Pepsi (Rhed) kung totoo bang “ni-rape” siya ni “Vic Sotto”. 

Nakasaad sa resolusyon ni Assistant City Prosecutor Elvin Keith Barrios:

“I HEREBY CERTIFY, that the crime or offense charged in this case has a prescribed penalty of not more than six (6) years of imprisonment without regard to fine and hence, an expedited preliminary investigation was conducted in this case pursuant to Section 8, Rule V of DOJ Department Circular No. 28 series of 2024…”

Sampung libong piso (P10,000 thousand) ang inirekomendang piyansa para sa kaso. 

Habang umaandar ang oras noong araw na iyon, naglabas naman ng desisyon ang korteng pumabor sa TV host-comedian sa naunang inihaing writ of habeas data petition nila laban sa pagpapakalat pa ng teaser ng nasabing movie.

Hanggang ngayon ay hindi pa rin naipapalabas ang pelikula na nakatakda sanang ipalabas noong February 5, 2025.

Pinulitika raw ni PBBM... PHILLIP, TODO-IYAK NA INARESTO SI DU30

ni Ador V. Saluta @Adore Me! | Mar. 13, 2025

Philip Salvador - Circulated, Maria Tan, FB

Marami ang nasorpresa sa pagkakaaresto kay dating Pangulong Rodrigo Duterte nitong March 11, 2025 ilang oras lamang pagkauwi nito mula sa isang bakasyon abroad. 

Siya’y inaresto ng mga pulis sa Ninoy Aquino International Airport (NAIA) at pansamantalang ikinulong habang naghihintay ng kaukulang proseso.  

Si Duterte ay iniimbestigahan ng International Criminal Court (ICC) dahil sa Extrajudicial Killings (EJK) habang siya ang nakaupo bilang pangulo ng Pilipinas mula Hunyo 2016 hanggang Hunyo 22, 2022.

Tinawag na EJK ang mga pagpatay sa mga taong may involvement umano sa drug trade na basta na lang dinukot sa mismong bahay at pinatay kinalaunan nang walang due process.

Ayon sa pna.gov.ph nu’ng March 30, 2022, ang EJK figures ng Philippine Drug Enforcement Agency (PDEA) ay: “6,229 ang namatay sa isinagawang 226,662 anti-drug operations simula noong July 2016 hanggang January 31, 2022.”

Ayon naman sa CHR (Commission on Human Rights) report ng November 2, 2021, ire-review nito ang info na “5,655 cases of anti-drug operations where deaths occurred including those being handled by the Administrative Order No. 35 Inter-agency Committee on Extra-Legal Series, Enforced Disappearances, Torture, and Other Grave Violations to Life, Liberty and Security of Persons.”  

Kung may ilang mamamayan ang nagmartsa at ipinagdiwang ang pagkakaaresto sa dating pangulo, marami rin ang nalungkot at ilan dito ay mga kaalyado sa PDP-Laban ni Duterte gaya ni Phillip Salvador.  

Ipinakita sa TV Patrol (TVP) ang mga eksena sa NAIA at isa sa mga nahagip ng kamera ay si Phillip habang umiiyak sa pagkakaaresto kay Digong. 

Nasa labas lamang si Ipe at ang mga kapwa niya Duterte supporters dahil hindi sila pinapasok sa loob ng headquarters ng Philippine Air Force (PAF).  

Sa panayam ng Cabinet Files kay Ipe, hindi niya maitago ang lungkot sa pagkakaaresto sa dating pangulo.  

“Sobrang pagod ang utak at katawan. I am so drained,” sabi ni Ipe.

Nagbigay din ng saloobin ang aktor sa nangyari sa pamamagitan ng Facebook

Messenger, tungkol sa naging kapalaran ni Duterte.  

Sinabi ni Ipe na pinulitika umano sila ng mga Marcos:

“Walang jurisdiction ang ICC sa bansa natin. Pulitika talaga ito.

“What a time to do this mockery two months before elections. Pinutulan kami ng ULO para ipakita na sila ang hari ng bansa, they can do anything at planadung-planado.

“Umalis silang lahat, nag-Amerika, saka nangyari ang lahat ng ito.”

Ang ‘silang lahat’ na tinutukoy ni Phillip ay ang administrasyong Marcos.

Ayon pa kay Phillip, sa kabila ng nangyari kay dating Pangulong Duterte, ay tuloy ang kanilang kampanya.  

“Basta kami, tuloy lang ang kampanya and like what PRRD always say, ‘DO WHAT IS RIGHT!’

“Meron tayong mas MALAKING DIYOS! Hindi Niya pababayaan ang bansa natin.

“Malungkot ang sambayanang Pilipino, malungkot ang Inang Bayan. May God bless us all,” pahayag ng aktor.  

Well! Well daw, oh?  

---

Gustong pasyal-pasyal na lang abroad… 

REGINE AT OGIE, PINAGHAHANDAAN NA ANG PAGRERETIRO SA SHOWBIZ

AMINADO si Asia’s Songbird Regine Velasquez na siya’y edad 54 na at inihahanda ang sarili sa usapang-retirement sa pagkanta balang-araw, especially sa ASAP kung saan siya regular tuwing Linggo sa Kapamilya Network.  

Ayon sa news entertainment anchor ng ABS-CBN na si MJ Felipe, isa sa mga napag-usapan sa interview ang tungkol sa pagreretiro.  

Ayon kay Regine, 6 more years to go bago siya maging certified senior citizen, hindi na raw siya natatakot pagdating ng panahon, bagkus pinaghahandaan na nito ang araw na ito bagama’t matagal-tagal pa naman daw.

Pahayag niya, “No, I’m excited. Actually, hindi naman. Parang, I’m trying to... ano’ng tawag diyan? Prepare myself for that.  

“I mean, it’s not gonna happen naman soon, but I’m preparing myself for that. Because itong work kasi na ito is very addicting, aminin mo ‘yan. Kasi ano, eh, instant gratification lahat, eh. Especially ‘pag nagko-concert ka, instant gratification, eh.  

“So, ipine-prepare ko ‘yung sarili ko na, ‘Okay ‘to, ‘yung mga nadi-disappoint ako habang nagko-concert ako. Siguro, this is God’s way na rin of letting me know, ‘Sige, dahan-dahan, para hindi ka…’ Para ‘pag umabot na ako du’n sa kailangan ko na mag-decide talaga na, ‘Yeah, I think it’s my time to stop,’ it wouldn't be too hard for me. And the thing is, I’m sure I’m gonna miss it. But, ‘yun na nga, parang siguro, hindi naman bigla.” 

Maging ang asawang si OPM icon Ogie Alcasid, now 57, ay nasabing pinaghahandaan na raw talaga nila ang retirement.  

Ayon sa Asia’s Songbird, “Matagal-tagal pa naman nang konti. Hindi pa naman ako mukhang 100. So, konti-konti. And ‘yun na nga, I'm preparing, my husband and I are preparing for it. Lalo na siya kasi he’s a bit older than me.  

“So, pinag-uusapan na namin ‘yun na, ‘‘Pag ganito, Hon, siguro, mag-lie-low na ako nang konti.’

“So, ang isip ko rin, ‘Ako rin, Hon.’” 

Sa ngayon, sa kanilang health nakatutok ang dalawa at nasa plano rin ng couple ang pamamasyal o pagbibiyahe abroad.  

Ani Regine, “And then, we wanna travel while we still can. So, that’s what we wanna do. That’s what I wanna do.”