ni Ador V. Saluta @Adore Me! | June 1, 2024
Now it can be told kung bakit nga ba nagkatampuhan ang It’s Showtime hosts na sina Vice Ganda at Billy Crawford noon.
Ikinuwento ni Vice sa kanyang YouTube vlog nu’ng May 27, 2024 nang maging guest niya ang singer na si Erik Santos ang dahilan kung bakit nagkatampuhan sila ni Billy.
Sa simula ng kanilang kuwentuhan, nabanggit ni Erik na nakaramdam siya ng matinding lungkot dahil ikinakasal na ang kanyang mga kaibigan.
Inamin naman ni Vice na naramdaman din niya ang katulad ng naramdaman ni Erik.
“Na-experience ko ‘yan dati nu’ng unti-unti na silang nagpapakasal — sina Karylle, Anne at Billy.
“Masaya ka para sa kanila, pero malungkot ka para sa sarili mo,” paglalahad ni Vice.
That time ay wala pa si Ion Perez sa buhay ni Vice Ganda.
At dahil nga sa nasabing lungkot o depression, nagplano siyang umurong sa imbitasyon sa kasal nina Billy at Coleen Garcia.
“Nu'ng kasal ni Billy, muntik kaming magkagalit, magkatampuhan. Kasi last minute, pinasok ako ng depression, ‘yun ‘yung time na unti-unting nade-develop ‘yung depression ko. Tapos ‘yung natatakot ako sa papalapit na kasal ni Billy dahil lalo akong nalulungkot,” sey ni Vice.
Naisip daw niyang baka maging forever na siyang single.
Patuloy niyang kuwento, “Tapos, hindi na ako pupunta sa kasal n’ya. Parang bukas ‘yung kasal niya, tapos today, nag-text ako sa kanya, ‘I won’t make it.’
“Nagalit talaga s’ya,” saad ni Vice.
“Tapos, hanggang ang dami kong alibi na wala na akong masasakyang eroplano. Tapos, inayos n’ya lahat para lang makapunta ako. Tapos, sabi niya, ‘Kung ayaw mong pumunta mismo sa wedding, at least, nandu’n ka lang sa Balesin. Kung ayaw mong panoorin ‘yung ceremony, at least, du’n ka lang sa Balesin.’”
Natuloy pa rin naman si Vice at dumalo sa wedding ceremony pero hindi na siya pumunta sa reception.
“After the ceremony, sobra na akong nalungkot, dumiretso ako sa kuwarto.”
'Yun naman daw ang naging tulay para makabuo ng matibay na pagkakaibigan si Vice kina Regine Velasquez at Ogie Alcasid nang puntahan siya at damayan sa kuwarto kung anumang problemang dala-dala niya.
Sabi ni Vice, “Kasi hinahanap nila ako. Tapos, sabi nila, ‘Si Bakla, nasa taas, ayaw bumaba.’ Inakyat nila ako.
“Tapos, habang nagdarasal na sila for me at nagkukuwentuhan kami, biglang si Regine, kailangan nang bumaba kasi kakanta na siya ng Araw-Gabi. Eh, hindi ko puwedeng hindi marinig si Regine kaya bumaba ako para lang marinig ko si Regine.”
Samantala, pinayuhan naman daw siya ni Ogie na 'wag magpatalo sa kanyang depression dahil maraming nagmamahal sa kanya.
