Ganadong Buffalos sasagasaan ang Express sa NBL-President's Cup

ni Anthony E. Servinio @Sports | September 13, 2024

Mga laro ngayong Biyernes – San Leonardo, NE

5 p.m. Valenzuela vs. Paranaque

7 p.m. Nueva Ecija vs. Cam Sur 

Sasalubungin ng host Nueva Ecija Granary Buffalos ang rumaragasang bisita Cam Sur Express sa pagpapatuloy ng 2024 National Basketball League (NBL-Pilipinas) President’s Cup ngayong Biyernes sa Nagano Gym sa San Leonardo.  

Ganado ang Buffalos at determinado laban sa nangungunang Express simula 7:00 ng gabi. Itinala ng Nueva Ecija ang unang panalo sa Nikkelham Valenzuela Workhorse, 129-102, noong Setyembre 1 sa Palayan City sa likod ni Best Player sentro Kian Fontanilla. Kailangan niya ngayon ng tulong nina Juancho Tolentino, Edgie Jejillos at buong koponan upang bahiran ang perpektong 4-0 kartada ng mga bisita. 

Sisiguraduhin ng Express na sulit ang malayong lakbay sa gitna ng patuloy na mahusay na ipinapakita ng mga baguhang sina Jerome Almario at Rafael Vibares. Maliban sa dalawa, balanse ang atake ng Cam Sur at kahit sinong ipasok ay nag-aambag. 

Sa unang laro, tiyak na makakamit ng Valenzuela (0-3) o Paranaque Smile 360 (0-4) ang unang tagumpay sa torneo sa unang laro ng 5 p.m. Nasa ilalim ng liga ang dalawang koponan at ang isa pang talo ay malalagay sa alanganin ang pag-asa nilang mapabilang sa semifinals. 

Sasandal muli ang Workhorse kay sentro Mark Jones Redulfa at mga guwardiyang sina Andrew Valencia at Marte Gil. Maliban sa Buffalos ay natalo sila sa Cam Sur, 80-131 at Tikas Kapampangan, 52-103. 

Dikit ang apat na talo ng Paranaque at lumalamang lang ng 5.3 puntos ang mga kalaro. Kailangan lang nila mahanap ang huling sipa at maaaring manggaling kay Angelo Obuyes, JR Galit, Vincent Rocero o Johnlor Llarves. 

Lilipat ang NBL-Pilipinas sa Colegio de Sebastian sa Linggo sa San Fernando. Unang haharapin ng defending champion Taguig Generals ang Buffalos at susundan agad ng host Tikas at Express.  

UST at Adamson mabangis, Pastrana at Etang sakalam

ni Anthony E. Servinio @Sports | September 12, 2024

Mga laro sa Sabado – Araneta

8 AM NUNS vs. FEU (JHS)

9:45 AM UPIS vs. FEU (JHS)

11:30 AM NU vs. FEU (W)

1:30 PM UP vs. UE (W)

4:30 PM NU vs. FEU (M)

6:30 PM UP vs. UE (M)

Naglabas muli ng bangis ang defending champion University of Santo Tomas Growling Tigresses at binigo ang Ateneo de Manila, 77-54, sa tampok na laro ng 87th UAAP Women’s Basketball Tournament kahapon sa Araneta Coliseum.

Hindi nagpaiwan ang Adamson U Falcons at tinalo ang De La Salle Green Archers sa 2nd game, 65-54. First half pa lang ay nagsabog ng 13 si Kent Pastrana para sa UST sa matinding palitan ng puntos kay Kacey dela Rosa ng Blue Eagles.

Ipinasok ng Tigresses ang unang apat na puntos ng pangalawang quarter para sa 36-20 bentahe subalit hindi pa sila tapos. Patuloy ang mainit na laro ni Pastrana at sinamahan siya ng mga kapwa beteranang Ana Mae Tacatac, Angelika Soriano at Rachelle Ambos at ang huling talaan ay siya ring pinakamalaking agwat na 23.

Nagtapos si Pastrana na may 20 habang bumira ng apat na tres si Tacatac para sa 14. Tumalon ang DLSU sa 7-4 lamang pero bumawi agad ang Lady Falcons hanggang naging 52-37 ang talaan maaga sa huling quarter.

Pumantay ang Adamson at UST sa 2-0 at maghaharap agad sila sa Sabado sa parehong palaruan para sa solong liderato. Namuno sa Lady Falcons si Elaine Etang na may 15. Tinukoy ni Etang ang pagiging bahagi ng Gilas Pilipinas 3x3 bago ang UAAP na nakatulong ng malaki sa kanyang paghahanda lalo na sa depensa.

Samantala sa mga laro ng Junior High School Boys, tinambakan ng De La Salle-Zobel ang Adamson sa second half para maukit ang kanilang pangalawang sunod na tagumpay, 97-82.

Tigers / Tigresses sinagpang ang dalawang Warriors

ni Anthony E. Servinio @Sports | September 9, 2024

Mga laro ngayong Miyerkules – Araneta

8:00 AM Adamson vs. DLSZ (HS)

9:30 AM UST vs. Ateneo (HS)

11:30 AM Adamson vs. DLSU (W)

1:30 PM UST vs. Ateneo (W)

4:30 PM Adamson vs. DLSU (M)

6:30 PM UST vs. Ateneo (M) 

Nagbigay ng magandang senyales ang University of Santo Tomas kung ano ang maging takbo ng kanilang kampanya at dinurog ang University of the East, 70-55, sa pangalawang araw ng 87th UAAP Men’s Basketball Tournament sa Araneta Coliseum Linggo ng hapon. Doble ang kasiyahan at sinimulan ng UST Tigresses ang depensa ng titulo sa Women’s Division sa 86-44 pagparusa sa UE Lady Warriors. 

Sa simula lang nakasabay ang UE at itinayo ang 6-4 lamang na agad binura ng UST para wakasan ang unang quarter, 18-8. Humugot ng lakas ang Growling Tigers sa Christian Manaytay, Mark Llemit at baguhan Mo Tounkara bago tinuldukan ni Nic Cabanero ang first half sa three-points kasabay ng busina, 36-19. Lalong nabuhayan ang UST at natamasa ang pinakamalaking lamang, 68-46, sa bisa ng magkasunod na buslo nina Angelo Crisostomo at Cabanero sa last two minutes.

Samantala, pumiga ang Tigresses ng 18 mula sa baguhan Karylle Sierba at 15 mula sa beterana Kent Pastrana para sa engrandeng simula. Nagdagdag ng 13 puntos, 13 rebound at walong agaw si Rachelle Anne Ambos.  

Sa sumunod na laro, namayani ang depensa ng Adamson University sa 59-47 tagumpay sa Far Eastern University. Ipinagpag ng Soaring Falcons ang mabagal na simula at bumanat sa second half sa likod nina Royce Mantua, Matthew Montebon, Matt Erolon at Mudiaga Ojarike. 

Namuno si Mantua na may 14 habang nagsama para sa limang tres sina Montebon at Erolon para kabuuang 21. Nanguna sa Tamaraws si Jorick Bautista na may 14, walo sa first half.