Cagulangan sakalam sa Fighting Maroons laban sa Blue Eagles

ni Anthony E. Servinio @Sports | September 7, 2024

Mga Laro ngayong Linggo – Araneta

9:00 AM UE vs. UST (W)

11:00 AM Adamson vs. FEU (W)

1:00 PM UE vs. UST

3:00 PM Adamson vs. FEU

6:30 PM DLSU vs. NU

Nagpadala ng mensahe ang host University of the Philippines ng kanilang determinasyon na mag-hari matapos mabigo ang Ateneo de Manila University, 77-61, sa unang laro ng ika-87 UAAP Men’s Basketball Tournament Sabado ng gabi sa Araneta Coliseum. Lamang ang Blue Eagles, 13-8, ngunit nagising ang Fighting Maroons at kinuha ang unang quarter, 17-16.

Inakyat ito sa 50-32 sa gitna ng third quarter at inalagaan ito ng mabuti ng UP hanggang huling busina. Nagsumite ang beteranong point guard Joel Cagulangan ng 17 puntos, pitong rebound at 10 assist. Sumuporta si Francis Lopez na may 14, kasama ang dalawang malakas na dunk sa huling apat na minuto na lalong nagdiin sa Blue Eagles, habang nagsungkit ng 17 rebound at pitong puntos si 6’10” sentro Quentin Millora-Brown.

Nanguna sa Blue Eagles ang baguhan na si Jared Bahay na may 13 puntos, ang parehong manlalaro na pinag-agawan ng dalawang nagharap na paaralan matapos magtapos ng High School sa Ateneo de Cebu.

Parehong nag-ambag ng tig-11 puntos sina Joshua Lazaro at Shawn Tuano habang humakot ng 11 rebound si Lazaro. Hinila pababa ang Ateneo ng kanilang minintis na 21 free throw.

Nagsama para sa 12 lang ang kanilang first five at napatawan ng kanyang ika-lima at huling foul si sentro Victor Balogun na may walong minuto pa sa huling quarter. Susunod para sa UP ang University of the East sa Setyembre 14. Bago noon, maglalaro ang Ateneo at University of Santo Tomas sa 11, lahat sa Araneta.

Gawilan 6th place sa freestyle finals sa Paris Paralympic Games

ni Anthony E. Servinio @Sports | September 3, 2024

Nakuntento si Ernie Gawilan sa ika-anim na puwesto sa Men’s 400-M Freestyle S7 Finals ng Paris 2024 Paralympics Swimming sa La Defense Arena. Isang mabigat na paborito magkaroon ng medalya, hindi naulit ni Gawilan ang kanyang malakas na inilangoy sa qualifying at wakasan ang kanyang kampanya.

Umoras si Gawilan ng 5:03.18 upang higitan sina Huang Xiaquan ng Tsina (5:09.53) at Yurii Shenhur ng Ukraine (5:13.31). Linampasan ng Pinoy si Huang makalipas ang 250 metro subalit masyadong malayo na ang mga nangunguna.

Napunta ang ginto kay Federico Bicelli ng Italya sa 4:38.70 at sinundan nina pilak Andrii Trusov ng Ukraine (4:40.17) at tanso Inaki Basiloff ng Argentina (4:40.27). Ang iba pang nagtapos ay sina Evan Austin ng Estados Unidos (4:48.91) at Aleksei Ganiuk ng Neutral Athletes (4:57.66).

Noong qualifying round ay nagwagi si Gawilan sa pangalawa ng dalawang karera at nagsumite ng oras na 5:00.13 at dinaig ang mga medallist Trusov (5:16.03) at Basiloff (5:19.46). Ang oras ng Pinoy ay ang pangatlong pinakamabilis na hinigitan lang nina Austin (4:56.54) at Ganiuk (4:56.68) na nanguna sa naunang karera kasama si Bicelli na pangatlo lang sa 5:06.51.

Naghintay ng walong oras bago bumalik ang mga kalahok sa tubig. Nakahanap ng lakas si Bicelli sa huling 150 metro kung saan siya at si Trusov ay naagaw ang liderato sa biglang bumagal na si Basiloff. Lumahok din sa 200-M Individual kung saan nagtapos siya sa ika-11 at huli sa oras na 2:56.39.

Nakamit ni Basiloff ang ginto sa 2:29.81, pilak kay Trusov sa 2:29.93 at tanso sa isa pang taga-Ukraine Yevhenii Bohodaiko sa 2:33.24. Nakatakdang lumangoy ang isa pang kinatawan ng bansa Angel Mae Otom sa Women’s 50-M Backstroke S5 ngayong Martes simula 4:30 ng hapon. Pagkatapos niyan ay sasabak siya sa 50-M Butterfly S5 sa Biyernes ng 3:53 ng hapon.

Turismo at mga tanyag na lugar igagala sa Galaxy Watch Manila at Cebu Marathon

ni Anthony E. Servinio @Sports | September 2, 2024

Nais ng parating na Galaxy Watch Manila Marathon na maging pangunahing karera sa bansa na maipagmamalaki ng mga Filipino sa buong daigdig. Ang nasabing takbuhan ay gaganapin sa Oktubre 6 sa Mall of Asia at inaasahang aakit ng mahigit 10,000 mananakbo. 

Kasama ang Department of Tourism at mga pamahalaang lokal ng mga daraanang lungsod, magiging bahagi ng ruta ang ilang tanyag na lugar sa lungsod gaya ng Rizal Park at Intramuros. Napipisil na malaki ang maitutulong ng mga karera tulad nito sa turismo sa paglahok ng mga galing mga lalawigan at ibayong dagat. 

Sa kanyang muling pagbisita sa lingguhang Philippine Sportswriters Forum, inamin ni race organizer Coach Rio dela Cruz na marami pang kailangan upang mapabilang sa Abbott Marathon Majors na naghahanap ng bagong mga karera na mahahanay sa Boston, Chicago, New York, London, Berlin at Tokyo Marathon. Subalit may panukala siya na magbuo ng katulad na serye sa Timog Silangang Asya at nakikipag-ugnayan siya sa mga marathon sa Bangkok, Kuala Lumpur, Jakarta, Hanoi at Singapore.

Ipinakilala din ni Coach ang Galaxy Watch Cebu Half-Marathon sa Nobyembre 24 sa City di Mare at tampok ang Cebu-Cordova Link Expressway na pinakamahabang tulay sa bansa. Ang nasabing karera ay huling patikim para sa Philippine Half-Marathon Series 2025 na magsisimula sa Baguio International Half-Marathon sa Enero 26 at tutuloy sa New Clark, Balanga, Maynila, Imus, Legazpi, Iloilo, Bacolod, Cebu, Cagayan de Oro, Dapitan at Davao. 

Samantala, nagdagdag ng dalawang yugto sa matagumpay na serye ng Takbo Para Sa West Philippine Sea sa Baguio sa Oktubre 13 at Dapitan sa Nobyembre 10. Kasama ang Setymbre 8 sa Cagayan de Oro, layunin ng fun run na ipagkaisa ang mga Filipino at ipaglaban ang karapatan sa karagatan.