Ex-misis, gusto raw pakasalan uli… YILMAZ, DARATING SA ‘PINAS PARA MAKASAMA SI RUFFA

ni Beth Gelena @Bulgary | Mar. 25, 2025

Photo: Yilmaz Bektas FB

Kinumpirma ni Yilmaz Bektas sa kanyang IG Stories na balak niyang bumisita sa Pilipinas sa lalong madaling panahon. 

“I would like to say, yes, this news is true. I will be visiting the Philippines soon,” ayon sa Turkish businessman na ex-husband ni Ruffa Gutierrez. 

Una nang naibahagi ni Ruffa na plano umano ni Yilmaz na muling mag-propose at pakasalan siya. Masaya si Ruffa na maayos na ang relasyon nila ngayon para sa kapakanan ng kanilang mga anak.

Nagbahagi si Ruffa ng makahulugang mensahe sa kanyang Instagram (IG) kamakailan. 

Ayon sa aktres, “The past is a place to learn from, not to live in.” 

Marami ang naka-relate sa kanyang pahayag na tila paalala na ang mga pinagdaanang karanasan ay dapat maging aral at ‘wag nang ulitin pa. 

---

HINDI maiwasan ni Cong. Arjo Atayde ang maging emosyonal nang halos lahat ng barangay sa District 1 ng QC kung saan ang aktor-pulitiko ang kongresista ay dumalo sa kanyang ipinatawag na State of the District Address (SODA) kahapon na ginanap sa SM Skydome. 

Sa aming pagkakaalam ay siya lamang ang nag-iisang congressman na nagpatawag ng SODA.

Maraming napahanga ang anak nina Sylvia Sanchez at Papa Art Atayde dahil napakahusay na niyang magsalita sa harap ng mga kapwa niya mambabatas at sa kanyang nasasakupan.

Ang slogan ng aktor-pulitiko ay Aksyon-Agad. Ang paliwanag niya, nang naisipan niyang tumakbo last 2022, ang unang naisip niya ay Aksyon-Agad dahil ang gusto niya ay makapagbigay ng agarang tulong. 

Hindi lamang daw sa salita kundi talagang inaaksiyunan niya ang lahat ng kaya niyang gawin.

Ang isa pa sa mga ikinatulo ng luha ni Arjo habang nag-i-speech ay ang tiwalang ibinigay sa kanya ng marami.

Pagtitiwala ang labis niyang pinanghahawakan sa mga tao dahil kapag may ‘TRUST’ ay panghabambuhay daw ito at ito ang kanyang napatunayan sa kanyang mga constituents.

Maraming nagawa si Arjo sa kanyang nasasakupan, kaya naman lubos talaga ang pagtitiwala sa kanya ng mga tao.

Kahit baguhan pa lang siya sa mundo ng pulitika, ipinakita niya kung papaano niya ginampanan ang kanyang trabaho.

Sure kaming kahit wala ang misis niyang si Maine Mendoza sa kanyang SODA ay proud na proud ito sa kanya.

---

PIOLO AT KIM, BEST ACTOR AT BEST ACTRESS SA STAR AWARDS FOR TV

TAGUMPAY ang 38th PMPC Star Awards for TV na ginanap sa Dolphy Theater last Sunday. Halos lahat ng major winners ay present. 

Si Piolo Pascual ang waging Best Actor sa mahusay niyang pagganap bilang isang pulitiko sa Pamilya Sagrado (PS). 

Si Kim Chiu ang Best Actress bilang si Juliana sa Linlang.

Best Supporting Actress naman si Janine Gutierrez bilang Iris sa Lavender Fields (LF).

Tie bilang Best Supporting Actor sina Arnold Reyes (My Guardian Alien) at Dennis Trillo (Pulang Araw), pero no show ang huli.

Tila reunion naman ito para sa tatlong mahuhusay na journalists/broadcasters na sina Noli de Castro (Best Male News Host para sa TV Patrol), Korina Sanchez (Best Female News Host para sa Agenda) at Julius Babao (na tumanggap naman ng Lifetime Achievement Award for Excellence in Broadcasting). Ang tatlo ay dating magkakasama sa TV Patrol. 

Si Coco Martin, talagang napaka-gentleman na actor. Hindi nakaligtas sa aming paningin na everytime na may mananalong winner na dumaraan sa kanyang harapan ay tumatayo ito at nagbibigay-pugay. 

Naloka naman kami nang malaman naming partner pala si Alden Richards at ang kanyang production na Myriad Entertainment ng Airtime Marketing ni Tess Celestino na producer ng PMPC Star Awards for TV. 

O, ‘di ba, napaka-humble ng aktor?

Bakas ng natanggal na taba… SHARON, IPINARETOKE ANG MGA BRASO NA SUPER-LAKI NG PEKLAT

ni Nitz Miralles @Bida | Mar. 25, 2025

Ipinakita ni Sharon Cuneta ang mahabang peklat sa magkabilaang braso niya matapos alisin ang excess skin dahil nga pumayat siya. 

Sa kanyang pagbisita sa Aivee Clinic, ipinakita ni Sharon ang operasyon sa mga braso niya at ang paliwanag ni Dr. Aivee sa procedure na gagawin sa kanya para ma-lessen ang peklat sa kanyang mga braso.

Sabi ni Dr. Aivee, gusto ni Sharon na ma-improve ang appearance ng scar niya sa arm dahil mahaba nga at may discoloration. 

Aniya, “To help her achieve this, we did a Radiant Scar Treatment, combining Carboxytherapy and RF Microneedling. This powerful combination helps fade the scar, refine skin texture, giving it a smoother, and more even appearance.”

Una nang nagpa-arm tuck si Sharon, kaya may mahaba siyang peklat sa kanyang mga braso at ang peklat na ‘yun ang gagawan naman niya ng paraan. May nag-akala namang nagpa-liposuction si Sharon, hindi raw pala natural ang pagpayat.

Samantala, ipinaliwanag ng mga fans ni Mega na natural ang kanyang pagpayat, loose skin lang sa mga braso na resulta ng kanyang pagpayat ang ipina-medical procedure niya. 

Tingnan n’yo naman, walang loose skin sa kanyang mga braso si Megastar Sharon Cuneta.

---

DEDICATED sa pumanaw niyang manager ang pagrampa ni Lovi Poe sa Bench Body of Work. 

Sa kanyang post after ng fashion show, hindi nakalimutan ng aktres si Leo Dominguez.

Sabi ni Lovi, “Still on high. But my real thoughts on stage! Sinigang after this! LOL.

“Seriously though, it’s been seven years since the last Bench show. I feel like I kinda grew up on this stage too and this experience was nothing short of amazing.

“Dedicating this post to my guardian angel Tito Leo who is celebrating his birthday today and dancing with me in heaven.”

Sa comment, mababasa ang comment ni Alden Richards na, “Hahaha! Let’s go, Love,” na sinagot ni Lovi ng “Cheers to downing 2 burgers.” 

Ibig yatang sabihin ni Lovi, after the fashion show at bago siya makakain ng sinigang na ini-imagine niyang kainin habang rumarampa siya, kumain sila ni Alden ng burger. 

Anyway, sa Bench fashion show, muling nagkita sina Alden at Lovi at makikita sa mga videos na lumabas na nagkakatuwaan ang dalawa. 

Natutuwa ang mga fans na hindi naputol ang kanilang friendship at ang request nga, sana ay gumawa sila ng movie na magkasama. Puwede raw na si Alden Richards na rin ang producer para matuloy lang.

---

Budots, out na! BONG, MAY BAGONG PINAUUSONG SAYAW SA KAMPANYA

SINAMAHAN ni Ara Mina si Senator Bong Revilla na mangampanya sa Pasig City at dahil pareho ang Lakas na political party nila, walang naging problema. 

Sa mga videos at photos na napanood namin, maraming tao ang sumalubong kina Bong at Ara at mainit silang tinanggap.

Inabot ng gabi ang pag-iikot ng dalawa sa Pasig at hindi nabawasan ang dami ng tao sa kalye na pangalan nina Bong at Ara ang isinisigaw. 

“Konsehal Ara” na ang tawag ni Bong sa aktres na tumatakbong konsehal sa 2nd District ng Pasig. Mukha ngang hindi mahihirapan si Ara sa pagpasok sa pulitika dahil tanggap siya ng mga taga-Pasig.

Si Bong naman, laging ipinaalala ang number niya sa balota at gaya sa iba niyang pinuntahan, t-shirt at bola ng basketball ang kanyang ipinamimigay. 

Para mas masaya pa, isinasayaw nito ang bago niyang campaign jingle na, “Ito na si Bong Revilla.”

Tapos na ang Budots kung saan, marami ang gumaya kay Bong. Ngayon, iba naman ang kanyang pinauuso.

Anomalya sa SHS Voucher Program, dapat tapusin at may panagutin

ni Kuya Win Gatchalian @Win Tayong Lahat | Mar. 25, 2025

Inanunsyo kamakailan ng Department of Education (DepEd) na hiningi nito ang tulong ng National Bureau of Investigation (NBI) upang imbestigahan ang mga iregularidad sa Senior High School Voucher Program (SHS-VP), kabilang ang pagkakaroon ng mga ‘ghost students’ o mga mag-aaral na walang sapat na dokumentasyon bilang benepisyaryo ng programa. 

Matatandaang una nang inanunsyo ng kagawaran na 12 pribadong paaralan sa siyam na divisions ang kanilang sinisiyasat.

Ayon sa DepEd, maaaring itigil ang pakikilahok ng mga pribadong paaralan sa SHS-VP kung mapapatunayang sangkot ang mga ito sa mga iregularidad. Papanagutin din ang mga kawani at mga opisyal na mapapatunayang sangkot sa mga gawaing ito.

Bilang Chairman ng Senate Committee on Basic Education, sinusuportahan natin ang mga hakbang na ito upang mapanagot ang mga sangkot sa mga itinuturing na anomalya. Para sa inyong lingkod, kailangang mabilanggo ang mga mapapatunayang sangkot sa mga iregularidad na ito. Hindi natin dapat palagpasin ang ginawa nilang panlilinlang sa mga mamamayang Pilipino. 

Noong nakaraang taon, pinangunahan ng inyong lingkod ang mga pagdinig upang repasuhin ang pagpapatupad ng Government Assistance to Students and Teachers in Private Education Act or the E-GASTPE law (Republic Act No. 8545). Marami tayong natuklasan sa mga ginawa nating pagdinig.

Batay sa datos ng Private Education Assistance Committee (PEAC), may 11,825 na benepisyaryo ng SHS-VP na may problema pagdating sa dokumentasyon mula School Year (SY) 2020-2021 hanggang SY 2022-2023. Umabot sa P310.4 milyon ang inaasahang refund na matatanggap ng pamahalaan dahil sa mga benepisyaryong ito na kulang sa dokumentasyon. Sa halagang ito, P71.1 milyon ang natanggap na ng pamahalaan samantalang P239.3 milyon pa ang hindi natatanggap. 

Para sa SY 2022- 2023, ipinatigil ng PEAC ang pakikilahok ng 22 pribadong paaralan sa SHS-VP. Sa isang paaralang inirekomendang masuspinde, kulang sa dokumentasyon o hindi mapatunayang totoong mag-aaral ang 79% o 8 sa 10 mga benepisyaryo ng SHS-VP.

Patuloy naman nating hinihimok ang DepEd na ilabas ang mga bagong guideline o pamantayan para sa pagpapatupad ng SHS-VP. Kabilang sa mga iminumungkahi natin ang pagtiyak na mabibigyang prayoridad ang mga pinakanangangailangang mag-aaral.

Iminumungkahi rin natin ang pagsasaayos ng billing system ng DepEd upang mas madaling masuri ang dokumentasyon ng mga mag-aaral at maging mas maayos din ang pagbabayad sa mga pribadong paaralan. 

Patuloy nating susubaybayan ang imbestigasyon sa mga isyung ito hanggang sa mapanagot natin ang mga dapat managot. Patuloy din nating isusulong ang mga reporma sa SHS-VP upang makamit natin ang mga layunin nitong maghatid ng dekalidad na edukasyon sa mga nangangailangang mag-aaral.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com